Recensión

O deseñador gráfico Rodrigo Losada e o cineasta Marcos Nine comparten unha inquietude. Despois de anos de experiencia nos seus respectivos traballos chegaron á frustrante conclusión de que, independentemente das diferencias temáticas ou formais dos distintos traballos que realizan, sempre son capaces de solucionalos cunha metodoloxía idéntica.

Para fuxir desta mecánica destrutiva da creatividade, Rodrigo ideou o proxecto La Brecha, nel servíase de materiais sacados do lixo para crear pequenas composicións dentro do formato de filmina que proxectadas deran vida a unha obra que inicialmente non fose controlada polo seu propio autor.

Tralos resultados deste traballo, Marcos Nine pretende levar ó cine ese mesmo proceso de traballo plantexando un filme evolutivo do cal nin o deseñador nin o propio director teñan control. A idea é aplicar ó material filmado as técnicas de degradación que o diseñador gráfico aplicou ás súas obras seriadas de filminas para, a continuación, montar un filme de xeito aleatorio co fin de evitar tódolos vicios adquiridos polos autores durante os seus anos de experiencia, e poder retornar así á creatividade máis pura e inocente.

La Brecha é un filme que cuestiona o concepto de obra de arte mentres pon de manifesto os mecanismos de autocensura e autocontrol dos creadores á hora de realizar as súas obras.